ગાંધીનગર ટ્રાફિક પોલીસ દ્વારા તાજેતરમાં આર્મી કેમ્પ ચીલોડા ખાતે એક વિશેષ ટ્રાફિક જાગૃતિ કાર્યક્રમનું આયોજન કરવામાં આવ્યું હતું. આ કાર્યક્રમનો મુખ્ય હેતુ આર્મીના જવાનો અને તેમના પરિવારના સભ્યોમાં ટ્રાફિકના નિયમો અને તેના પાલન અંગે જાગૃતિ લાવવાનો હતો.
આ કાર્યક્રમમાં ટ્રાફિક પોલીસ અધિકારીઓએ વાહન ચલાવતી વખતે ધ્યાનમાં રાખવા જેવી બાબતો, હેલ્મેટ પહેરવાનું મહત્વ, સીટ બેલ્ટનો ઉપયોગ અને ઓવરસ્પીડિંગથી થતા અકસ્માતો જેવા અનેક મુદ્દાઓ પર વિગતવાર સમજણ આપી હતી.
આ ઉપરાંત, અકસ્માત સમયે ઈજાગ્રસ્તોને તાત્કાલિક સારવાર પૂરી પાડવામાં મદદ કરનાર વ્યક્તિઓને સરકાર તરફથી મળતા રોકડ પુરસ્કાર વિશે પણ માહિતી આપવામાં આવી હતી. આ પહેલનો હેતુ લોકોને અકસ્માતના સમયે મદદ કરવા પ્રોત્સાહિત કરવાનો છે, જેથી ઈજાગ્રસ્તોને સમયસર સારવાર મળી રહે.
આ કાર્યક્રમમાં આર્મીના જવાનો અને તેમના પરિવારોએ ઉત્સાહપૂર્વક ભાગ લીધો હતો, અને ટ્રાફિકના નિયમો વિશે જાણકારી મેળવી હતી. આ પ્રકારના કાર્યક્રમો સમાજમાં ટ્રાફિક સુરક્ષા પ્રત્યે જાગૃતિ વધારવામાં મદદરૂપ થાય છે.
