અમદાવાદ: ઉપરવાસમાં ભારે વરસાદને પગલે સાબરમતી નદીમાં પાણીની આવક વધી છે, જેના કારણે જળસ્તર ભયજનક સપાટીએ પહોંચ્યું છે. ધરોઈ ડેમમાંથી 60,000 ક્યુસેક પાણી છોડવામાં આવતા, નદીનું પાણી અમદાવાદના રિવરફ્રન્ટના નીચાણવાળા વિસ્તારોમાં ફરી વળ્યું છે.
વહીવટી તંત્ર દ્વારા ત્વરિત કાર્યવાહી
સાબરમતી નદીમાં પાણીનું સ્તર વધતા, વહીવટી તંત્રએ તાત્કાલિક પગલાં ભર્યા છે. વાસણા બેરેજના 25 દરવાજા ખોલીને 51,126 ક્યુસેક પાણી છોડવાનું શરૂ કરાયું છે, જેથી પાણીનો પ્રવાહ જાળવી શકાય અને વધુ નુકસાન અટકાવી શકાય.
નીચાણવાળા વિસ્તારોને એલર્ટ
નદીમાં પાણીની વધતી જાવકને કારણે અમદાવાદ અને તેની આસપાસના નીચાણવાળા વિસ્તારોને એલર્ટ કરવામાં આવ્યા છે. ધોળકા તાલુકાના નવાપુરા, સરોડા, અને ચંડીસર જેવા નદીકાંઠાના ગામોને સાવચેત રહેવા જણાવાયું છે. આ ઉપરાંત, અમદાવાદના વટવા અને વેજલપુર જેવા વિસ્તારોમાં પણ લોકોને સુરક્ષિત સ્થળોએ ખસી જવા માટે સૂચનાઓ આપવામાં આવી રહી છે.
વહીવટી તંત્ર દ્વારા આ પરિસ્થિતિ પર સતત નજર રાખવામાં આવી રહી છે અને લોકોને મદદ કરવા માટે તમામ પ્રયાસો કરવામાં આવી રહ્યા છે. સ્થાનિક નાગરિકોને નદી કિનારાથી દૂર રહેવાની અપીલ કરવામાં આવી છે.
